ឧកញ៉ា វេង លីតិចឡានិងប្រពន្ធដែល មានចិត្តសាហាវព្រៃផ្សៃគ្មានសេចក្តីថ្លៃថ្នូរ ធ្វើទារុណកម្មលើរូបរាង្គកាយក្មេងស្រី២នាក់
បានដាក់មេប្រ៉ូចបាត់ស្រមោលឈឹងទាំងពីរនាក់ប្ដីប្រពន្ធបាត់
ហើយបន្ទាប់ពី ជនរងគ្រោះដាក់ពាក្យបណ្តឹង
ដោយសមត្ថកិច្ចយឺតពេលមួយជំហានក្នុងការតាមចាប់ខ្លួនជនសង្ស័យទាំង
២នាក់នោះ។ប្រភពព័ត៌មានពីក្មេងស្រីគ្រោះឈ្មោះ សង់ គន្ធា បានប្រាប់អោយដឹងថា នៅពេលដែលនាងមានអាយុ៧ឆ្នាំបានមករស់នៅជាមួយនឹងអ៊ំស្រីឈ្មោះ ហ៊ុង សុខា អាយុ៥១ឆ្នាំ ដោយសារតែឪពុកម្ដាយនាងបានស្លាប់ចោលអស់។ បន្ទាប់មកមានឧកញ៉ាម្នាក់និងភរិយាបានមកសុំនាងយកទៅចិញ្ចឹម នៅ រាជធានីភ្នំពេញ។
ក្មេងស្រីរងគ្រោះ ឈ្មោះ សង់ គន្ធា បានរៀបរាប់ទៀតថា ចាប់ពីនាងចូលទៅរស់នៅក្នុងភូមិគ្រឹះនោះ ក៏បានជួបជាមួយនឹងក្មេងស្រីម្នាក់ទៀតដែលចូលទៅតំណាលគ្នាដែរ។ នាងបន្តថា ការងាររបស់នាងគឺថែទាំឆ្កែចំនួន១៩ក្បាល បោសជូត សំអាតអនាម័យ វីឡាបីជាន់ និងបោកគក់ ខោអាវគ្រប់បែបយ៉ាង ហើយបើសិនជារូបនាងធ្វើការងារខុសតែបន្តិចក៏ត្រូវបានស្ត្រីជា ប្រពន្ធឧកញ៉ាដែលមានឈ្មោះថា លី ពៅនោះវាយធ្វើទារុណកម្មយ៉ាងខ្លាំងដោយប្រើខ្សែភ្លើងវេញ ចូលគ្នាវាយធ្វើបាប មានពេលខ្លះវាយនឹងដងអំបោសជូតផ្ទះ និងពេលខ្លះទៀតយកដង្កាប់ចាប់មួលសាច់នាងរហូតហូរឈាមដំបៅពេញ រាង្គកាយ។ នារីរងគ្រោះបន្តថា ការធ្វើទារុណកម្មនេះតាំងពីពួកនាងនៅតូចៗអាយុ៨ឆ្នាំមកម្ល៉េះ មានពេលមួយនោះ រូបនាងបានលួចរត់គេចពីផ្ទះនោះដែរ តែត្រូវគេចាប់បានវិញហើយពេលនោះ ឧកញ៉ាថែមទាំងបានគំរាមថាបើហ៊ានរត់លើកក្រោយទៀតពេលចាប់បានគេនឹង សម្លាប់នាងចោលតែម្ដង។
ដោយសារតែ ការគំរាមនេះពួកនាងទាំង២នាក់ស៊ូទ្រាំរស់នៅទាំងការភិតភ័យ ទ្រាំទ្រនឹងទារុណកម្មសព្វគ្រប់បែបយ៉ាងគ្មានពេលស្រាកស្រាន្តឡើយ។
ក្មេងស្រីរងគ្រោះឈ្មោះ សង់ គន្ធា ក៏បានបន្តទៀតថា ដោយការធ្វើទារុណកម្មខ្លាំងពេកនៅថ្ងៃទី១៨ ខែកុម្ភៈ ឆ្នាំ២០១៣រូបនាងទាំង២នាក់ក៏បានពិភាក្សាគ្នារកឱកាសដើម្បីរត់ ទៀត។ លុះដល់ព្រឹកថ្ងៃទី២២ ខែកុម្ភៈ ឆ្នាំ២០១៣ ខណៈពេលដែលលោកឧកញ៉ារូបនោះនិងភរិយាមិននៅផ្ទះ ហើយអ្នកយាមភ្លេចខ្លួន រូបនាងក៏បានលួចចេញមកក្រៅអង្វរម៉ូតូឌុបឲ្យជូនរូបនាងទាំង២នាក់ ទៅខេត្តបាត់ដំបង។ ពួកនាងបានមកដល់រង្វង់មូលលោកតាដំបងគ្រញូងទីរួមខេត្តបាត់ដំបង ក៏បានយំអង្វរម៉ូតូឌុបនោះព្រោះរូបនាងអត់មានប្រាក់នោះទេ ហើយកម្លាំងសមត្ថកិច្ចនគរបាលខេត្តបាត់ដំបងក៏បាននាំនាងទាំង២ទៅកាន់ ការិយាល័យប្រឆាំងការជួញដូរមនុស្ស និងការពារអនីតិជន ដើម្បីដាក់ពាក្យបណ្ដឹងឲ្យជួយរកយុត្តិធម៌។
បន្ទាប់ ពីទទួលបានពាក្យបណ្ដឹងរួចមកសមត្ថកិច្ចប៉ូលិសនៃការិយាល័យ ប្រឆាំងការជួញដូរមនុស្ស និងការពារអនីតិជនខេត្តបាត់ដំបង បានផ្ដល់ព័ត៌មានទៅនាយកដ្ឋានប្រឆាំងការជួញដូរមនុស្សនិង ការពារអនីតិជនក្រសួងមហាផ្ទៃ និងបានតាមឃាត់ខ្លួនជនសង្ស័យជាឧកញ៉ា និងប្រពន្ធ ទាំង២នាក់នោះដើម្បីសាកសួរ ប៉ុន្តែវាយឺតពេលទៅហើយដោយអ្នកឧកញ៉ាវេង លីតិចឡា និងប្រពន្ធ លីពៅ បាននាំគ្នាដាក់មេប្រ៉ូចបាត់ហើយមុនពេល សមត្ថកិច្ចទៅដល់៕
