សារព័ត៌មាន China Daily បាននិយាយថា តំបន់ធំទូលាយនៃប្រទេសចិនកំពុងជួបសិសិររដូវដ៏ត្រជាក់បំផុតក្នុងរយៈពេល៣ទសវត្សរ៍មកនេះ ដោយវាបង្កើនថ្លៃថាមពលក៏ដូចជាថ្លៃផលិតកម្ម និងការចែកចាយផលិតផលកសិកម្ម។
អាកាសធាតុត្រជាក់ ក៏កំពុងគំរាមដល់ការផ្គត់ផ្គង់អគ្គិសនី ហើយមានរបាយការណ៍ថា សត្វគោក្របីប្រមាណ ១៨០.០០០ក្បាល បានងាប់នៅភាគខាងជើង។
សីតុណ្ហភាពនៅចិនត្រជាក់បំផុតនៅភាគឦសាន ធ្លាក់ដល់ដក១៥,៣អង្សាសេ ជាកំរិតត្រជាក់បំផុតក្នុងរយៈពេល៤២ឆ្នាំមកនេះ។
នៅតំបន់អ៊ិននឺ ម៉ុងហ្គោលីភាគខាងកើតសីតុណ្ហភាពចុះដល់ដក៤០អង្សាសេ។
ភាពត្រជាក់ខ្លាំងបំផុតមិនធ្លាប់មាន ក៏ត្រូវបានគេរាយការណ៍ផងដែរ នៅអាស៊ីខាងត្បូង និងមជ្ឈិមបូព៌ា។
នៅប្រទេសឥណ្ឌាភាគខាងជើង ក៏ជួបភាពត្រជាក់ខ្លាំងផងដែរ ដោយចាប់តាំងពីរដ្ឋអ៊ុតតា ប្រាដេស ដល់រដ្ឋធានីដេល្លី អាកាសធាតុត្រជាក់នេះ បានសម្លាប់មនុស្ស១៧៥នាក់។
ដោយឡែកនៅក្នុងប្រទេសរុស្ស៊ី សិសិររដូវឆ្នាំនេះ ជួបភាពត្រជាក់បំផុតចាប់តាំងពីឆ្នាំ១៩៣៨មក និងសីតុណ្ហភាពចុះដល់ដក៥០អង្សាសេ នៅតំបន់ខ្លះ៕
