យុវជនម្នាក់បានស្លាប់ភ្លាមៗនៅកន្លែងកើតហេតុ ខណៈពេលយុវជនរូបនោះងោកបណ្តាលអោយធ្លាក់ចូលទៅខាងមុខនរី ហើយត្រូវនរីកិនពីលើ រមៀលក្រោមនរីដាច់សាច់ទាំងដុំៗកាលពី ម៉ោង៣ទៀបភ្លឺ ថ្ងៃទី៣០ ខែមករា ឆ្នាំ២០១៣ ។ យុវជនរូបនោះមាន ឈ្មោះ ញីវ យូ អាយុ១៩ឆ្នាំ ភេទប្រុស រស់នៅភូមិស្រែតាជ័យ ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំងបានស៊ីឈ្នួលដឹកជញ្ជូនឈើអោយថៅកែឈើម្នាក់នៅរ៉ាក្តុល យកទៅលក់អោយឈ្មួញនៅរ៉ាបាត់ដឹង ខេត្តកំពង់ស្ពឺ ពេលទំលាក់ឈើអស់ត្រឡប់មកវិញ ងងុយដេកក៍បានងោកធ្លាក់ពីលើនរីបណ្តាលអោយនរីកិនស្លាប់តែម្តងទៅ ។ ហេតុការខាងលើបានកើតឡើងកាលពីម៉ោង៣ទៀបភ្លឺ ថ្ងៃទី៣០ ខែមករា ឆ្នាំ២០១៣ លើកំណាត់ផ្លូវរថភ្លើងចំណុចអន្លុងតាឳ ស្ថិតក្នុងឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។ យោងតាមប្រភពពីប្រជាពលរដ្ឋបានអោយដឹងថា នរីដែលបង្កគ្រោះថ្នាក់អោយឈ្មោះខាងលើស្លាប់នោះជាកម្មសិទ្ធរបស់ឈ្មោះ ចែឆេង ជាថោកែរកស៊ីឈើដុះស្លែម្នាក់ នៅរ៉ាក្តុល ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ហើយជនរងគ្រោះខាងលើតែងស៊ីឈ្នួលដឹកឈើតាមនរីអោយឈ្មោះឆេង ដឹកចេញពីរ៉ាបំណក់ ស្រុកក្រគរ ខេត្តពោធិសាត់ និង ពេជជោ រ៉ាក្តុល ស្រុកទឹកផុស ខេត្តកំពង់ឆ្នាំង ដឹកយកទៅចែកចាយលក់នៅរ៉ាមនោគ ស្រុកសាមគ្គីមានជ័យ រ៉ាបាត់ដឹង ស្រុកអង្គស្នួល ខេត្តកណ្តាល និង រ៉ាពោធិចិនតុង រាជធានីភ្នំពេញផងដែរ ។ បច្ចុប្បន្ន សាកសពជនរងគ្រោះខាងលើត្រូវបានក្រុមគ្រួសារ យកទៅធ្វើបុណ្យតាមប្រពៃណី ។ គេមិនដឹងថាតើថៅកែឈើដែលជួលយុវជនរូបនោះជួយឧបត្ថមដល់ដល់គ្រួសារជនរងគ្រោះប៉ុន្មាននោះទេ ប៉ុន្តែដាច់ខាតត្រូវតែមានសំណង ព្រោះជនរងគ្រោះស្ថិតនូវ ក្នុងកិច្ចសន្យាការងាររបស់ខ្លួនដែលទាមទារអោយមានការទទួលខុសត្រូវ។គួររម្លឹកថានេះជាលើកទី២ហើយដែលកម្មករស៊ីឈ្នួលដឹកឈើតាមនរីបានស្លាប់ងោយធ្លាក់ពីលើនរី ដែលការស្លាប់លើកទី១ បានកើតឡើងកាលពីចុងឆ្នាំ២០១២ កន្លងទៅ ។នេះជាការបើកដៃពីក្រុមសមត្ថកិច្ចពាក់ព័ន្ធ ពិសេសគឺសមត្ថកិច្ចជំនាញមេព្រៃដែលឈរ ជើង និងប្រចាំការនៅតាមតំបន់ផ្លូវរថភ្លើង ដែលមួយថ្ងៃៗគ្មានគិតគូរពីការទប់ស្កាត់បទល្មើសព្រៃ ឈើតាមអនុសាសន៍ និអសារាចរណ៍លេខ០១ របស់សម្តេចតេជោ ហ៊ុន សែន ប្រមុខរដ្ឋាភិបាលកម្ពុជា ឡើយ គិតពីប្រមូលលុយចែកគ្នាដាក់ហោប៉ៅ ចែកគ្នាធ្វើមានធ្វើបាន មានឡានថ្មីទំនើប ជិះ ស្ទើរគ្រប់គ្នា។ ហើយការប្រមូលលុយនេះគឺមិនរើសមុខ រាប់តាំងពីអុស ធ្យូង និង ឈើ គ្រប់ប្រភេទ ។
