លោកលុកម៉ាន់ ហាគីម ទទួលបន្ទុកភ្នាក់ងារជាតិគ្រប់គ្រងគ្រោះមហន្តរាយធម្ម ជាតិឥណ្ឌូណេស៊ីបានអះអាងកាលពីថ្ងៃទី២១ ខែមករា ឆ្នាំ២០១៣ថា ទឹកជំនន់ខ្លាំងក្លាបំផុតនៅក្រុងហ្សាការតា ចាប់ពីថ្ងៃទី១៥ មករា បណ្តាលឱ្យមនុស្សស្លាប់ឡើងដល់២០នាក់ហើយ មនុស្សប្រមាណជា ២៥០.០០០នាក់ រងការប៉ះពាល់ដោយគ្រោះធម្មជាតិនេះ។
លោកហាគីម បញ្ជាក់ថា មកដល់ថ្ងៃទី២១ មករា ទឹកជំនន់បានចុះស្រកនៅតំបន់ភាគច្រើនដែលរងការប៉ះពាល់ ក៏ប៉ុន្តែនៅភាគខាងជើងក្រុងសង្កាត់មួយចំនួននៅតែលិចទឹក។ ស្ថិតិចុងក្រោយដែលយើងទទួលបាននាថ្ងៃទី២១ មករា បញ្ជាក់ថាមនុស្ស២០នាក់ស្លាប់ក្នុងគ្រោះទឹកជំនន់នេះ ។
លោក លុកម៉ាន់បន្តថា ទឹកជំនន់ប៉ះពាល់ដល់មនុស្ស២៤៩.១៥៤នាក់។ ទឹកជំនន់នេះបណ្តាលមកពីភ្លៀងធ្លាក់ខ្លាំងបំផុតពុំធ្លាប់ ជួបប្រទះចាប់តាំងពី៥ឆ្នាំមកហើយ។
គ្រោះមហន្តរាយនោះ ធ្វើឱ្យស្ទះដល់សកម្មភាពពាណិជ្ជកម្ម និងជីវភាពសាធារណៈនៅក្រុងហ្សាការតា ខណៈទឹកជន់លិចបណ្តាមជ្ឈមណ្ឌលពាណិជ្ជកម្ម និងបណ្តាអគាររដ្ឋបាល។ ក្រុងហ្សាការតាប្រកាសអាសន្នទឹកជំនន់រហូតដល់ថ្ងៃទី២៧ មករា៕
