ប្រទេសជប៉ុនបានធ្វើសមយុទ្ធយោធា ដើម្បីពង្រឹងការការពារលើប្រជុំកោះដែលជាចំណុចកណ្តាលនៃជម្លោះទឹកដីជាមួយប្រទេសចិន។ ការធ្វើសមយុទ្ធប្រចាំឆ្នាំនេះវាជាលើកទី១ ដែលបានធ្វើនៅជិតទីក្រុងតូក្យូ កាលពីថ្ងៃអាទិត្យទី១៣ ខែមករា ឆ្នាំ២០១៣។
លោកអ៊ីតស៊ូណូរី អូណូដេរ៉ា រដ្ឋមន្ត្រីក្រសួងការពារជាតិជប៉ុន បាននិយាយថា ប្រទេសជប៉ុនត្រូវបង្កើនសមត្ថភាពយោធា ដោយធ្វើឲ្យយុទ្ធសាស្ត្រយោធារបស់ខ្លួនកាន់តែល្អប្រសើរឡើង ខណៈដែលកំពុងមានជម្លោះទឹកដីជាមួយប្រទេសចិន។
យន្តហោះ និងនាវាចិនជាច្រើនគ្រឿងបានរំលោភបំពានទឹកដីជប៉ុន ទាំងនៅដែនសមុទ្រ និងដែនអាកាសជប៉ុននៅជុំវិញប្រជុំកោះដែលមាន ជម្លោះនេះ នៅសមុទ្រចិនខាងកើត ដែលជប៉ុនហៅថា ប្រជុំកោះសេនកាគូនេះ។ ជាមួយគ្នានេះ ប្រទេសចិនក៏បានអះអាងសិទ្ធិកាន់កាប់លើប្រជុំកោះដែលខ្លួនហៅថាទាវយូនេះផងដែរ៕
